À u XVIII^u seculu, in Roma a festa teni una piazza d’impurtanza. Di più ch’è in altri capitali aurupeani, a cità hè u teatru di parechji avvinimenti spittaculari, liati à a vita rilighjosa ma avendu sopratuttu un scopu diplumaticu. Roma si trova à u cori di l’Auropa è ci stani l’imbasciati di tutti i nazioni di u cuntinenti ma hè dinò u locu di residenza di parechji suvrani chì stani sottu à a prutizzioni di u Papa, com’è Maria Casimira di Pologna o Jacques III Stuart, pratindenti à u tronu d’Inghilterra, incù a so famiglia.

Ogni diligazioni aurupeana tinia à cilibrà i so avvinimenti i più impurtanti, com’è i nasciti o matrimonii riali, chì s’aghjustaiani à i festi liati à l’alizzioni di i Papa o à i canunisazioni, par via di a pusizioni cintrali è neutra di Roma. Tutti sti cilibrazioni ani fattu nascia eccessi da tutti i parti : archi di trionfu, falsi facciati incù statuli di raprisintazioni alligorichi pà i palazzi è ancu pà i ghjesgi, strutturi effemeri à centru di i piazzi è sopratuttu arnesi à focu d’artifizii giganti. Parechji artisti, architetti, pittori è scultori ani participatu à st’attività scenograffica cuntinua, aiutati da i più grandi artisgiani spicializati d’Auropa. Ani fattu capi d’opara à li volti incù dimensioni spripositi com’è a stallazioni pirutecnica custruita in u 1728 pà i doppii nozzi di Spagna è di u Purtugali,  alta di più di 40 metri.

A Chinea era una festa chì vultaia ogni annu : era l’umaghju fattu da Riami di Napuli à Santu Seghju, pà u quali erani alzati strutturi pà fochi d’artifiziu rimpiazzati u lindumani da nuvelli scinugraffii pà smaraviglià u publicu.

L’attività musicali era assai ricca anch’ella. Puru s’è ind’a prima mità di u seculu, l’opera, pà via di i ristrizzioni di u Papa, ùn era cusì prisenti ch’è in Venizza o in Napoli, parechji teatri privati faciini milodrami è cantati. I raprisintazioni d’oratorii sacrati o prufani, i serinati di cumimurazioni, guasgi sempri accumpagnati di missi in scena spittaculari, erani dinò assai numarosi.