Dapoi u Midievu, ind’u paisaghju citatinu di Roma ci sò sempri stati parechji ghjesgi. À u principiu di u XVIIIu seculu, ci n’era tantu, sopratuttu vistu a pupulazioni di a cità – in fini di contu assai chjuca – ch’ùn c’era bisognu di custruisciani d’altri. Eppuru, unipochi di ghjesgi funu tutti rifatti à quella epica (I Santi Apostoli) è ci fù parechji travagli di mudernizazioni o di rimissa à a moda in certi ghjesgi à li volti assai anziani (di San Clemente à Santa Cecilia).
Ind’a ghjesgia a più impurtanti di a cristianità, a basilica San Petru, si parsuvitaia l’impresa pluriseculari di dicurazioni à mosaica, locu induva dui di i più gran pittori di l’epica, Batoni è Subleyras, ch’ani rializatu pitturi d’altari fatti par essa in stu matiriali. U Francesu avia, sicondu i spicialisti di l’epica, a suprana annant’à u talianu.
À u principiu di u seculu novu, ind’a navata di a catidrali di Roma (San Ghjuvà di Latran), dighjà rifatta à l’occasioni di u ghjubileu di u 1650 annant’à i dissegni di Francesco Borromini, dui grandi opari funu compii : a culussali seria di l’Apostuli in marmaru pà i nichji di sottu è da sopra, quella di i Prufeti annant’à teli uvali, chì fecini di stu locu una di i rializazioni maiori di a Roma muderna.
Pà i cirimonii di biatificazioni è canunizazioni si pudia veda sceni spittaculari chì, ind’a Roma di quelli tempi, pocu si valiani. Ramintaiani dinò ch’è in Roma, ancu puru s’ellu s’andaia ver di u seculu di i Lumi, a Ghjesgia è l’arti rilighjosi erani sempri u prinicipali impiigatori di l’artisti. Di sicuru, ùn era più a Ghjesgia di San Carulu Borromée o di San Filippu Neri, com’è a mostrani l’intiriori di San Petru o di San Ghjuvà di Latran di Panini è di Piranese, chì s’assumigliani à galarii principeschi. Ci si vedi gruppi di visitori, guasgi turisti, movasi ind’u locu chì ùn pari mancu più misticu. D’altrondi, à a fini di i travagli di Santa Maria Maggiore fatti da Ferdinando Fuga, in u 1750, Benoît XIV dissi : « on croirait que nous sommes des régisseurs de théâtre car ça ressemble à une salle de bal. »
