Incù a impurtanza di a so cullizzioni di pitturi taliani, u Palazzu Fesch-museu di l’Arti Belli s’hè datu a missioni d’apprufundiscia i studii annant’à i scoli taliani di u XVIIu seculu assai menu prisenti ind’i musei francesi, da quì i mostri passati cunsacrati à Firenza, Milanu è Vinezza. A Roma barocca hè di sicuru megliu cunnisciuta da u publicu francesu è intarnaziunali, ma quella di u XVIIIu seculu chì ghjughji nanzu à l’istituziunalizazioni di u « Grand Tour » è u sbucciumi di u neoclassicisimu ferma sempri un pocu piattu. In Francia, hè di sicuru u Palazzu Fesch chì teni u più opari d’artisti attivi in roma à quella epica, ghjustifichendu tandu d’urganizà pà a prima volta una mostra annant’à stu sughjettu.
Pà u più, a mostra tocca à a prima parti di u seculu, chì vedi a transizioni d’un cuntestu pà u più tardu-baroccu marcatu da i parsunalità forti chì sò Le Bernin è Carlo Maratti, à un ambienti culturali cuntrastatu è cumplessu, ind’u quali a lascita di i maestri di u passatu ferma prisenti è ditarminanti, di pettu à impurtanti nuvità purtati da artisti vinuti da altri rughjoni o puru da u stranieru.
I parechji aspetti di a Roma di tandu sò sviluppati ind’a mostra : A Roma di a veduta, chì incantaia i primi « Gran turisti », quella di l’Accademii, ancu a francesa, quella dinò di i festi è di i cilibrazioni, di i palazzi è di i so dicori, è di sicuru quella di a Ghjesgia è di u so lussu.
