L’Accademia di San Luca nasci com’è una curpurazioni d’artisti à a fini di u XVIu seculu. Accuglia maestri chì s’erani illustrati in i duminii di a pittura, a scultura o l’architittura. Era guvirnata da un Principi, elettu ogni annu.
L’istituzioni ùn prupunia micca corsi à aghjenti, ma l’accademichi aviani u dritti di dà i so corsi privati ind’i so attelli. Soli l’artisti di l’Accademia di San Luca riciviani i cummandi publichi.
Da u 1695 sin’à u 1713, l’Accademia fù guvirnata da Carlo Maratti chì u classicisimu tardo-baroccu hà influinzatu à u minimu dui ghjinirazioni d’artisti. Fù l’agenti di a pulitica artistica di u papa Climenti XI, fendu spampillà u so puntificatu è crescia a prupaganda di a Ghjesgia. Hè sott’à a dirizzioni di Maratti chì funu iniziati i cuncorsi ditti climentini, pà incuraghjì è ricumpinsà i ghjovani talenti.
Fundata in Parighji in u 1648 annant’à u mudellu di l’accademia rumana, l’Accademia riali di pittura è di scultura fù cuncipita, ella, com’è una vera scola induva erani dati corsi rigulari da furmà l’artisti futuri degni di raprinsintà a Francia. À partasi da u 1661, l’Accademia teni a so sedi in Roma è in u 1725 si stalla ind’u pristighjosu Palazzu Mancini, annant’à u Corsu. I lei trà i dui accademii sò sempri stati stretti è i dui stituzioni ani avutu membri è dirittori in cumunu.
Incù quelli chì sò ghjunti dopu à Climenti XI, i finanzamenti di l’Accademia di San Luca sò calati, i cuncorsi erani più scarsi. L’influenza di Maratti s’hè fatta più pocu è l’artisti stranieri si stallonu di manera ufficiali annant’à a scena accademica rumana. Ancu s’è i primi alluntaneri incù u marattismu sò stati visti ind’è Benedetto Luti, Sebastiano Conca è Francesco Trevisani, u veru scambiamentu fù fattu da Marco Benefial.
À l’epica di Benoît XIV, i cuncorsi ani ripresu un tempu, sott’à a dirizzioni di Francesco Mancini. In u 1754 fù inagurata a scola di u nudu.
D’altri nazioni ani avutu a so accademia in Roma, com’è u Purtugali, l’Austria, l’Allimagna è l’Inghilterra, ma nisuna ùn hè ghjunta à u nivellu di a Francia.
