À u XVIIIu seculu, Roma hè, dopu à Napuli, a cità ind’ellu campa u più ghjenti in Italia : i vedute di Giovanni Paolo Panini sò i tistimonii vigurosi di a pupulazioni rumana numarosa chì s’accoglia ind’i stretti è i piazzi di a capitali. Eppuru, l’ochju di falcu di u Prisidenti de Brosses, ossirvatori aggalabatu di a Roma di 1739-1740, facia rimarcà dinò chì a cità avia in u so cori parechji lochi guasgi diserti. Sti lochi erani parchi, giardini è ancu chjosi cultivati ; spazii ind’ellu c’era parechji ruini induva capri o muntoni si ni pasciani tranquilli. I pittori di paisaghji di u XVIIIu seculu, pà u più frusteri di l’Italia, ani trascrittu sta particularità di Roma ind’i so pitturi è acquarelli. Prisintaiani tandu una cità virdicanti chì tinia, à u seculu di i mitrupoli, una diminsioni bucolica tributaria di u passatu.
Un antru tistimoniu avezzu di a Roma di u XVIIIu seculu, Montesquieu, prisenti ind’a cità papali in u 1729, in quantu à ellu faci u custattu di a vitalità di i scambii trà i ricchi culliziunisti stranieri è l’artisti è agenti chì travagliani pà dalli pristighjosi è priziosi « ricordi » di a cità. « Roma nuvella vendi pezzu à pezzu l’anziana » dici Montesquieu incù acutezza. Eppuru, i musei d’antichi cunnoscini ind’u listessu tempu in Roma una staghjoni strasurdinaria : incù a vulintà di i gran Papi di u XVIIIu seculu, i musei di u Capitolu è di u Vaticanu arricchiani è turnaiani à sparghja i so cullizioni, mustrenduli à i criatori è à i sapienti. U cunsirvatori di u Scagnu di i Midagli di a Curona di Francia, Jean-Jacques Barthélémy, salutaia « u populu di i statuli » chì accuglia u visitori ind’i salli di u Capitolu è dicia di u nuvellu museu ch’ellu era « gran libru di l’anticarii ».
Hè « u disparatu » di Roma chì pò scumudà u spiritu raziunali di u viaghjadori scalatu da u nordu, è sopratuttu da Francia : u Prisidenti de Brosses rigreta in particulari chì annant’à a famosa piazza del Popolo à l’intrata di a cità « tuttu [fussi] di palazzi è di capani ». In fatti in Roma, i casi di i ricchi sò vicini à quelli di u populu è l’aristucrazia cuttighjeghja i classi mudesti com’è l’universu abbundenti di u cleru. Quellu chì và à spassu pò avè una surpresa à ogni scornu di stretta è hè ciò chì ni faci l’incantu di a cità.
