Fora di a famiglia di i prupriitarii, sò i sicritarii, l’impiicati, i parcittori è i dumestichi chì staiani ind’i palazzi rumani. Pà u più, i palazzi erani custruiti da i famigli liati à u Papa, da i cardinali o da i banchieri chì tiniani una piazza di prima trinca ind’ì l’ecunumia di u Statu. U palazzu era di stu fatu, un locu di raprisintazioni, un simbulu di puteri è l’idea di u rangu di a famiglia.

À li volti accadia ch’è u Papa ùn fussi micca rumanu o forsi isciutu d’una famiglia stallata di pocu in Roma. Tandu, tuccaia à tutta a famiglia di truvassi à spiccera una risidenza degna di u so nuvellu statutu, parenti di u suvranu in regnu, ch’ellu fussi à u nivellu di i diminsioni è ancu à quellu di u dicoru archititturali. D’altrondi, di manera ginirali, u Papa pinsaia subitu à marità unu di i so nipoti incù una donna isciuta di l’alta aristucrazia rumana. Cusì, fora di i binifizii ch’ellu avia u cardinali nipoti, a famiglia s’assicuraia d’un’ascinzioni socio ecunomica difinitiva.

I dissegni di Nicoletti mostrani una stuttura interna d’un palazzu rumanu tippicu. À l’intrata, sculturi antichi è muderni staiani ind’ì nichji. A so prisenza, veru segnu d’ilivazioni suciali, era l’introitu di u lussu di l’intiriori incù i so tapizzarii, pitturi, mobuli for di prezzu è oghjetti priziosi.

A pittura di Giovanni Paolo Panini raprisintendu a cullizzioni di u cardinali Silvio Valenti Gonzaga mostra comu u fattu d’accoglia opari, sopratuttu pitturi, ch’elli fussini cuntimpurani o di maestri più anziani, era pà l’aristucrazia una manera di distinguisi, mustrendu a so ricchezza è a so cultura. Ind’u listessu tempu, cultivà l’arti belli facia entra i prupriitarii ind’u chjerchju sufisticatu di l’intillituali. Erani tandu Accademichi d’onori di l’Accademia dell’Arcadia o quella di San Luca. I so risidenzi erani discritti ind’i guidi è faciini vena viaghjadori scelti, struiti o « milords » inglesi chì faciini u so « Grand Tour ».

L’insemi di ciò chì hè prisintatu ind’a mostra, fattu in parechji sizzioni da falla assai più chjara, saria pussutu essa un dicoru di palazzu rumanu, incù a so variità è a so eleganza, capaci à ellu solu di raprisintà a maghjina plurisiculari è cumplessa di u patrimoniu senza altru di a cità, in tutta a so « grandi billezza ».